ನಾವು ಎಂತಹ ಹೇಸಿಗೆ ವ್ಯವಸ್ಥೆಯಲ್ಲಿದ್ದೇವೆ ಎಂದೆನಿಸುತ್ತದೆ.

ಲೋಕಾಯುಕ್ತರ ಗಣಿ ಕುರಿತ ವರದಿಯನ್ನು ಸೋರಿಕೆ ಮಾಡಿದ ಸರಕಾರದ ಭಾಗಿದಾರರು ಬಹಳ ಹರ್ಷ ವ್ಯಕ್ತಪಡುತ್ತಿರಬಹುದು. ಮಾನ್ಯ ಮುಖ್ಯಮಂತ್ರಿ ಯಡಿಯೂರಪ್ಪನವರು ಆ ಗ್ಯಾಂಗ್ ಗೆ ಒಂದು ಒಳ್ಳೆಯ ಭಕ್ಷೀಸನ್ನೇ ಕೊಡಬಹುದು. ಗುಮ್ಮನ ಗುಸಕ್ಕನ ತರಹ ಮಾರಿಷಸ್ ನಲ್ಲಿ ಕುಳಿತಿರುವ ಸಿಎಂ ಮಹಾಶಯರಿಗೆ ಇದು ಒಳ್ಳೆಯ ಬೆಳವಣಿಗೆಯಾಗಿರಬಹುದು. ಅದಕ್ಕಿಂತಲೂ ಮತ್ತೊಂದು ಅಗ್ನಿಪರೀಕ್ಷೆಯಲ್ಲಿ ಪಾಸಾಗಿದ್ದೇನೆ ಎಂದುಕೊಂಡು ಬೀಗುತ್ತಿರಬಹುದು. ಆದರೆ, ಇಡೀ ವ್ಯವಸ್ಥೆಯ ಬಗ್ಗೆಯೇ ಬೇಸರ ಮೂಡುತ್ತದೆ. ಇದು ಸುಧಾರಿಸುವ ನೆಲೆಯಲ್ಲಿ ಇಲ್ಲವೆಂಬ ಹತಾಶೆಯೂ ಮೂಡುತ್ತದೆ.

ಮೂರು ವರ್ಷಗಳಲ್ಲಿ ನಮ್ಮ ಮಾನ್ಯ ಮುಖ್ಯಮಂತ್ರಿ ಯಡಿಯೂರಪ್ಪನವರು 30 ಕ್ಕೂ ಹೆಚ್ಚು ಬಾರಿ ಘೋಷಿಸಿದ್ದಾರೆ ರಾಜಾರೋಷವಾಗಿ, “ಭ್ರಷ್ಟರನ್ನು ಸಹಿಸುವುದಿಲ್ಲ, ನಮ್ಮ ಸರಕಾರ ಭ್ರಷ್ಟರಿಗೆ ಬೆಂಬಲ ನೀಡುವುದಿಲ್ಲ” ಇತ್ಯಾದಿ. ಅವೆಲ್ಲವೂ ಎಷ್ಟೊಂದು ಬಾಲಿಶವಾಗಿದ್ದವು ಎಂಬುದಕ್ಕೆ ಸದ್ಯದ ಘಟನೆಯೇ ನಿದರ್ಶನ.

ಪ್ರಜಾತಂತ್ರ ವ್ಯವಸ್ಥೆಯಲ್ಲಿರುವ ನಾವು ಎಷ್ಟೊಂದು ಮೂಢರಂತೆ ಈ ಜನಪ್ರತಿನಿಧಿಗಳಿಗೆ ಅಧಿಕಾರ ಕೊಟ್ಟಿದ್ದೇವೆ ಎಂದೆನಿಸುತ್ತಿದೆ. ಮುಖ್ಯಮಂತ್ರಿಯೆಂಬ ಪದಸ್ಥಾನವನ್ನು ಸ್ಥಾಪಿಸಿ, ಅವನಿಗೆ ಎಲ್ಲ ಅಧಿಕಾರ ಕೊಟ್ಟು-ಎಲ್ಲಿಯವರೆಗೆ ಎಂದರೆ ನಮ್ನನ್ನೂ ನಾಳೆ ಬೇರೆಯವರಿಗೆ ಮಾರಿಬಿಡಬಹುದು. ನಾವು ಜೀತದಾಳುಗಳಂತಿದ್ದೇವೆ ಅವನಿಗೆ-ಆಡಳಿತ ನಡೆಸಲು ಕೂರಿಸಿದ್ದೇವೆ. ಅಂತಹವನೇ ಭ್ರಷ್ಟರನ್ನು ಪೋಷಿಸಿ, ಒಳ್ಳೆಯದನ್ನು ನಿರಾಕರಿಸುವ ಸ್ಥಿತಿಗೆ ಮುಟ್ಟಿದೆ ಎಂದರೆ ಏನು ಹೇಳಬೇಕೆಂದೇ ಅರ್ಥವಾಗುತ್ತಿಲ್ಲ.

ಗುರುವಾರ ವಾಹಿನಿಯೊಂದರಲ್ಲಿ ಲೋಕಾಯುಕ್ತರ ವರದಿ ಸೋರಿಕೆ ಕುರಿತ ಬೆಳವಣಿಗೆಯನ್ನು ವ್ಯಾಖ್ಯಾನಿಸುತ್ತಿದ್ದ ಪತ್ರಕರ್ತರೊಬ್ಬರು,”ಒಬ್ಬ ಪ್ರಾಮಾಣಿಕ ವ್ಯಕ್ತಿಯನ್ನು ಎಲ್ಲ ಭ್ರಷ್ಟ ಅಧಿಕಾರಿಗಳು, ಸರಕಾರ ಎಲ್ಲವೂ ಸೇರಿ ಹೇಗೆ ಸುತ್ತುವರಿದು ಜರ್ಝರಿತಗೊಳಿಸುತ್ತವೆ’. ಈ ಮಾತು ಅಕ್ಷರಶಃ ನಿಜ. ಸಂತೋಷ್ ಹೆಗ್ಡೆಯವರು ರಾಜಕಾರಣಿಗಳಿಗೆ ಮಗ್ಗುಲ ಮುಳ್ಳಾಗಿದ್ದು ನಿಜ. ಅದಕ್ಕಾಗಿ ಈ ವರಸೆ ಆರಂಭಿಸಿದರು. ಎಲ್ಲ ರಾಜಕಾರಣಿಗಳೂ ಬಾಯಿಗೆ ಬಂದಂತೆ ಮಾತನಾಡಿದರು. ಬಿ. ಕೆ. ಹರಿಪ್ರಸಾದ್ ರಂತಹವರೂ ನಾಚಿಕೆ ಬಿಟ್ಟು ಮಾತನಾಡಿದರು. ಎಲ್ಲರದ್ದೂ ಒಂದೇ ಉದ್ದೇಶ-ಹತಾಶೆಗೊಂಡು ಪದವಿ ಬಿಟ್ಟರೆ ನಾವೂ ಕ್ಷೇಮ-ನೀವೂ ಕ್ಷೇಮವೆಂಬ ಲೆಕ್ಕಾಚಾರ. ಅದೇ ಈಗ ಆಗಿರುವುದು.

ಅಣ್ಣಾ ಹಜಾರೆಯಂತಹವರು ಕಠಿಣ ಲೋಕಪಾಲ ಕಾಯಿದೆಗೆ ಆಗ್ರಹಿಸಿ ನಿರಶನ ನಡೆಸಿದಾಗಲೂ ಕೆಲವರು ಬಾಯಿಗೆ ಬಂದಂತೆ ಮಾತನಾಡಿದರು. ಅದೂ ತಂತ್ರವೇ. ಉದ್ದೇಶಿತ ಮಾರ್ಗದಿಂದ ದೂರಸರಿಸುವುದಷ್ಟೇ ಏಕೈಕ ಉದ್ದೇಶ. ಅದಕ್ಕೆ ಆರೋಪಿ ಸ್ಥಾನದಲ್ಲಿ ನಿಲ್ಲಲು ಅರ್ಹರಾದವರೂ ಪ್ರಾಮಾಣಿಕ ವ್ಯಕ್ತಿಗಳ ಬಗ್ಗೆ ಟೀಕೆ ಮಾಡುತ್ತಾರೆ. ಅವರಿಗೆ ಜನರು ಏನೆಂದುಕೊಳ್ಳುತ್ತಾರೋ ಎನ್ನುವುದಕ್ಕಿಂತಲೂ ತಮ್ಮ ಕೆಲಸ ಸಾಧಿಸಿದರೆ ಸಾಕು. ಹಾಗಾಗಿ ಜನರ ಟೀಕೆಗಳಿಗೆ, ವ್ಯಂಗ್ಯಗಳಿಗೆ ಬಗ್ಗುವುದಿಲ್ಲ.

“ವಿಶ್ವಾಸಘಾತುಕತನಕ್ಕೆ ಹಲವರು ಅಪ್ಪಂದಿರು, ವಿಶ್ವಾಸಕ್ಕೆ ಒಂದೇ ಅಮ್ಮ’. ಬಹಳಷ್ಟು ಮಂದಿಗೆ ವಿಶ್ವಾಸಘಾತುಕತನದ ಅಪ್ಪಂದರಿ ಮಗನೆಂದೇ ಹೇಳಿಕೊಳ್ಳಲು ಚಟ, ಹಾಗಾಗಿ ಇಂದಿನ ಸಂದರ್ಭದಲ್ಲಿ ವಿಶ್ವಾಸ ಅನಾಥ. ಒಂದು ಎಜುಕೇಟೆಡ್ ಸರಕಾರ ಮಾಡುವ ರೀತಿಯಾ ಇದು ? ಎಂಬುದು ನನ್ನ ಪ್ರಶ್ನೆ.