ಪುಟ ಹತ್ತು
ಇಂಥ ಸಹಕಾರಿಗಳಾದ ನಮ್ಮದು ವಿಚಿತ್ರ ತಮಾಷೆಯ ಬದುಕು. ಹಲವು ಘಟನೆಗಳು ಮಾಸಿ ಹೋಗಿರುವಾಗ ರಾತ್ರೆಯಷ್ಟೇ ಹರ್ಷನಿಗೆ ಫೋನ್ ಮಾಡಿದ್ದೆ. ಒಂದೊಂದೇ ನೆನಪಿನ ಗರಿ ಷೋಕೇಸ್‌ನಲ್ಲಿಡತೊಡಗಿದ. ಒಂದರ ಬಣ್ಣವೂ ಮಾಸಿರಲಿಲ್ಲ. ಹಾಗೆಯೇ ಫಳ ಫಳ ಹೊಳೆಯುತ್ತಿತ್ತು.
ಆಗಸ್ಟ್ ೧೫ ಕ್ಕೆ ಇನ್ನೇನು ಒಂಬತ್ತು ದಿನ ಬಾಕಿಯಿದೆ. ಅದಕ್ಕೇ ಸಂಬಂಧಿಸಿದ ಒಂದು ಘಟನೆಯನ್ನು ವಿವರಿಸುತ್ತೇನೆ. ಅದು ನಮ್ಮ “ಗುಣಾವಗುಣ’ಗಳನ್ನು ಹೇಳಬಹುದು ಎಂಬುದು ನನ್ನ ಲೆಕ್ಕಾಚಾರ. ಆಗಸ್ಟ್ ೧೫ ಎಂದಿನಂತೆಯೇ ಬಂತು ಎಲ್ಲರಿಗೂ, ಆದರೆ ನಮಗೆ ಮಾತ್ರ ಅಲ್ಲ. ಮೊದಲೇ ಹೇಳಿದಂತೆ ನಮ್ಮದು ಚಿಕ್ಕ ಗಲ್ಲಿ. ಆದರೆ ಆ ಗಲ್ಲಿ ಇದ್ದದ್ದು ಮುಖ್ಯರಸ್ತೆಗೆ ಹೊಂದಿಕೊಂಡಂತೆಯೇ. ನಮ್ಮ ಮನೆಯಲ್ಲಿ ಉಪ್ಪರಿಗೆ ಎಂಬುದೊಂದಿತ್ತು. ಇನ್ನೊಂದು ಲೆಕ್ಕದಲ್ಲಿ ಹೇಳುವುದಾದರೆ ಅದು ಬೇಸಿಗೆ ಅರಮನೆ. ಮಹಾರಾಜರ ಕಾಲದಲ್ಲಿದ್ದಂತೆಯೇ. ಬೇಸಿಗೆ ಕಾಲದಲ್ಲಿ ಅಲ್ಲಿ ಮಲಗಲು ಬೇಡಿಕೆ ಹೆಚ್ಚುತ್ತಿತ್ತು.
ಆ ಆ. ೧೫ ರಂದು ಬೆಳಗ್ಗೆ ಬೇಗ ಎದ್ದೆವು. ನಮ್ಮ ಲೀಡರ್ ಟೈಲರ್ ರಮೇಶ್ ಅವರ ಮನೆಗೆ ಕೆಲವರು ಹೋಗಿ ಕರೆ ತಂದೆವು. ಅವರೇ ನಮ್ಮ ಅತಿಥಿ. ನಾವು ಎಂಟೂ ಮಂದಿ ರಸ್ತೆಯಲ್ಲಿ ಅಂದರೆ ಮನೆ ಮುಂದೆ ಸಾಲಾಗಿ ನಿಂತೆವು.
ಉಪ್ಪರಿಗೆ ಮೇಲೆ ಹೋದ ರಮೇಶ್ ಬಾವುಟ ಹಾರಿಸಿದರು. ರಸ್ತೆಯಲ್ಲಿ ಸಾಲಾಗಿ ನಿಂತ ನಾವು “ಜನಗಣಮನ’ ರಾಷ್ಟ್ರಗೀತೆ ಹಾಡಿದೆವು. ಇದ್ದಕ್ಕಿದ್ದಂತೆ ಮನೆ ಎದುರು ರಾಷ್ಟ್ರಗೀತೆ ಗಾಯನ ಕೇಳಿಬಂದದ್ದಕ್ಕೆ ಅಚ್ಚರಿಪಟ್ಟ ಪಕ್ಕದ ಮನೆಯವರು ಹೊರಗೆ ಬಂದರು. ನಗುವುದೊಂದೇ ಬಾಕಿ.
ರಸ್ತೆ ಮೇಲೆ ಹೋಗುತ್ತಿದ್ದವರೂ ನಮ್ಮ ಸಾಲು ಕಂಡು ದಂಗಾಗಿ ನಿಂತರು. ನಾವ್ಯಾರೂ ನಗಲಿಲ್ಲ. ಶಿಸ್ತಿನಿಂದ ಶಾಲೆಯಲ್ಲಿ ರಾಷ್ಟ್ರಗೀತೆ ಹಾಡುವ ಮಕ್ಕಳ ಹಾಗೆ ಅತ್ತ ಇತ್ತ ನೋಡದೇ ಹಾಡಿದೆವು. …ಜಯಹೇ ….ಜಯಹೇ ಎಂದು ಮುಗಿಸಿ ಹಿಂದೆ ತಿರುಗಿ ನೋಡುತ್ತೇವೆ…ಪಕ್ಕದ ಮನೆಯ ಗೆಳೆಯನ ತಂದೆ, ಚಿಕ್ಕ ತಮ್ಮ, ಅಮ್ಮ ಎಲ್ಲರೂ ಸಾಲಾಗಿ ನಿಂತು ಧ್ವಜ ವಂದನೆ ಸಲ್ಲಿಸುತ್ತಿದ್ದರು. ನಿಜವಾಗಲೂ ಆಗ ನಗು ಬಂದದ್ದು ನಮಗೇ ನಮ್ಮನ್ನು ಕಂಡು.
ಗೆಳೆಯ ಹರ್ಷ ಮತ್ತು ಇತರರು ತಕ್ಷಣವೇ ತಂದ ಚಾಕಲೇಟ್ ನ್ನು ಎಲ್ಲರಿಗೂ ಹಂಚಿದರು. ರಸ್ತೆಯಲ್ಲಿ ನಿಂತವರಿಗೂ ಕೊಟ್ಟರು. ಪಕ್ಕದಲ್ಲೇ ಇದ್ದ ನರ್ಸರಿ ಶಾಲೆಯ ಹೋಗಿ ಮಕ್ಕಳಿಗೆ ಚಾಕಲೇಟ್ ಹಂಚಿದೆವು. ಅಲ್ಲಿನ ಟೀಚರ್…”ಎಲ್ಲಿಯದು?’ ಎಂದು ಕೇಳಿದ್ದಕ್ಕೆ ಅಲ್ಲಿಯದು ಎಂದು ತೋರಿಸಿದ ಗೆಳೆಯರ ಬೆರಳನ್ನೇ ನೋಡುತ್ತಾ ದಂಗಾಗಿ ನಿಲ್ಲುವ ಸರದಿ ಟೀಚರ್ ನದ್ದಾಗಿತ್ತು.
ಬಾವುಟ ಹಾರಿಸಿದ ಅತಿಥಿಗಳಿಗೆ ಉಪಾಹಾರ ಸತ್ಕಾರವೂ ಆಯಿತು. ಉಪ್ಪಿಟ್ಟು ಮಾಡಿದ್ದೆವು. ಎಲ್ಲರೂ ಕುಳಿತು ಅತಿಥಿಗಳೊಂದಿಗೆ ಕುಳಿತು ಹರಟುತ್ತಾ, ನಮ್ಮನ್ನು ನಾವೇ ಗೇಲಿ ಮಾಡಿಕೊಳ್ಳುತ್ತಾ, ಒಬ್ಬೊಬ್ಬರೂ ಹಾಡಿದ ರಾಷ್ಟ್ರಗೀತೆಯಲ್ಲಿನ ಸ್ಪೆಲ್ಲಿಂಗ್ ಮಿಸ್ಟೇಕ್ಸ್ ಅನ್ನು ಎತ್ತಿ ಹಾಡುವಾಗ ಮಧ್ಯಾಹ್ನ ೧೨ ಕಳೆದದ್ದು ತಿಳಿಯಲಿಲ್ಲ.
ಸರಕಾರಿ ರಜೆ ಇದ್ದರೆ ನಮ್ಮ ಆಫೀಸಿಗೆ ರಜೆ ಇರುವುದಿಲ್ಲ. ಆದರೆ ಸುದ್ದಿ ಮಾಡುವವರ ಮತ್ತು ಸುದ್ದಿಯಾಗುವವರು ಅಂದು ವಿರಾಮ ಘೋಷಿಸಿರುತ್ತಾರೆ. ಆದ್ದರಿಂದ ನಮಗೂ ಕೊಂಚ ಆರಾಮ.
ನಿಧಾನಕ್ಕೆ ಅನ್ನ-ಸಾಂಬಾರ್ ಮಾಡಿಕೊಂಡು ಊಟ ಮಾಡಿ ಒಂದು ನಿದ್ರೆ ಮಾಡಿ ಆಫೀಸಿಗೆ ಹೊರಟೆವು. ನಮ್ಮ ದುರಾದೃಷ್ಟ ಕಚೇರಿಗೆ ಬಂದಾಗಲೇ ಗೊತ್ತಾಗಿದ್ದು…ನಗರದಲ್ಲಿ ಒಂದು ಕೊಲೆಯಾಗಿದೆ ಎಂಬುದು !
ಇಷ್ಟರ ಮಧ್ಯೆ ಹರ್ಷನ ರಸಮಂಜರಿಯಲ್ಲಿ ಬಹಳ ಪ್ರಸಿದ್ಧವಾದ ಹಾಡು ಯಾವುದು ಗೊತ್ತೇ ?…!