ಚಿತ್ರಿಕೆ

ಅವನಿಗೆ ಇವನು ಆಳು !

ಬಸ್‌ಸ್ಟ್ಯಾಂಡ್ ಎದುರಿನ ಕ್ಯಾಂಟೀನಿನಲ್ಲಿ ಗ್ಲಾಸ್ ತೊಳೆಯುತ್ತಿರುವ ಪೋರನಿಗೆ ಹನ್ನೆರಡು ತುಂಬಿದೆ. ಪಾದರಸದಂಥ ಹುಡುಗ. ಬಾಯಲ್ಲಿ ಏನಾದರೂ ಗುನುಗಿಕೊಳ್ಳುತ್ತಿದ್ದರೆ ಸಮಾಧಾನ. ಅವನ ಕೆಲಸವಿಷ್ಟೇ. ಗ್ಲಾಸ್‌ಗೆ ಸೋಪು ಹಾಕಿ ನೀರಲ್ಲಿ ಅದ್ದಿ ತೆಗೆದು ರಾಶಿ ಹಾಕುವುದು, ನೀರಿನ ತೊಟ್ಟಿಯಲ್ಲಿ ಗ್ಲಾಸನ್ನು ಅದ್ದಿ ತೊಳೆಯುವುದೆಂದರೆ ಅವನಿಗೆ ಖುಷಿ.

ಕೆಲಸವಿಲ್ಲದಿದ್ದರೆ ಮಾಡುವುದಿಷ್ಟೇ. ಗ್ಲಾಸೊಂದನ್ನು ನೀರಲ್ಲಿ ಅದ್ದುವುದು, ಉಂಟಾಗುವ ಶಬ್ದಕ್ಕೆ ಕಿಸಿ ಕಿಸಿ ನಗುವುದು. ಯಾರಾದರೂ “ಯಾಕೋ’ ಎಂದು ಕೇಳಿದರೆ “ನಮ್ಮಜ್ಜನ ನೆನಪಾಗುತ್ತದೆ’ ಎನ್ನುತ್ತಾನೆ. ಅವನಜ್ಜ ಬಾಯಿ ಮುಕ್ಕಳಿಸಿದಾಗ ಇದೇ ರೀತಿಯ ಶಬ್ದವಾಗುತಿತ್ತಂತೆ. ಅದಕ್ಕೆ ಆತನಿಗೆ ಗ್ಲಾಸೊಂದಿಗೆ ಆಟ.

ಊರಿನ ಏಕಮೇವ ಸರಕಾರಿ ಶಾಲೆಯ ಪಾಲಾಗಬೇಕಿದ್ದ ಈ ಪೋರ ಕ್ಯಾಂಟೀನಿಗೆ ಬೆಳಕಾಗಿದ್ದಾನೆ ; ತನ್ನ ಮನೆಯಲ್ಲಿ ಕತ್ತಲೆಗೆ ದಾರಿ ಮಾಡಿಕೊಟ್ಟು. ಆರನೇ ಕ್ಲಾಸಿನ ಮೊದಲ ಬೆಂಚಿನಲ್ಲಿ ಕೂತಿರಬೇಕಿತ್ತು. ಮೇಸ್ಟ್ರು ತಿದ್ದುವುದನ್ನೇ ಅಭ್ಯಾಸ ಮಾಡಿಕೊಂಡು ಪಾಠ ಒಪ್ಪಿಸಬೇಕಿತ್ತು. “ನಮ್ಮ ದೇಶದ ಮೊದಲ ಪ್ರಧಾನಿ ನೆಹರೂ…ಮೊದಲ ರಾಷ್ಟ್ರಪತಿ ಬಾಬು ರಾಜೇಂದ್ರ ಪ್ರಸಾದ್…, ನಮ್ಮದ ಸ್ವತಂತ್ರ ದೇಶ…’ ಹೀಗೆ ಸಮಾಜಶಾಸ್ತ್ರ ಕಲಿಯಬೇಕಿತ್ತು.

ಶಾಲೆಯ ಆಟದ ಬಯಲಲ್ಲಿ ಆಡಿ ಮನೆಗೆ ಓಡಿಬಂದು ಅಮ್ಮನನ್ನು ಅಪ್ಪಿಕೊಳ್ಳಬೇಕಿತ್ತು. ಅಮ್ಮ ಕೊಡುವ “ತೊಡು’ ತಿಂದು “ಈಗ ಬಂದೆ’ ಎನ್ನುತ್ತಾ ಆಟದ ಎರಡನೇ ಅಧ್ಯಾಯ ಆರಂಭಿಸಬೇಕಿತ್ತು. ಅಪ್ಪನ ಬರವು ಕಂಡು ಓಡಿ ಪುಸ್ತಕ ತಿರುವು ಹಾಕುವ “ಆಟ’ದಲ್ಲಿ ಮುಳುಗಬೇಕಿತ್ತು. ಅಕ್ಟೋಬರ್, ಏಪ್ರಿಲ್ ಪರೀಕ್ಷೆಯ ಭೂತಕ್ಕೆ ಪಾಠ ಉರು ಹೊಡೆದು ಆತ್ಮವಿಶ್ವಾಸದ “ತಾಯಿತ’ ಕಟ್ಟಿಸಿಕೊಳ್ಳಬೇಕಿತ್ತು. ಈಗ ಅದೆಲ್ಲಾ ಬಿಟ್ಟು ಬಿಟ್ಟಿದ್ದಾನೆ.

ಜೀವನ ಪರೀಕ್ಷೆಗೆ ಕುಳಿತುಕೊಂಡಿರುವವನಿಗೆ ತಿಂಗಳಿಗೆ ಮುನ್ನೂರು ರೂಪಾಯಿ. ಗ್ಲಾಸು ಒಡೆದದ್ದಕ್ಕೆ ೩೦ ರೂ. ಕಡಿತ. ಕುಡಿದು ಹಾಳು ಮಾಡುವ ಅಪ್ಪನಿಗೋ ಹಣದ ಗಿರ; ಉಳಿದ ಹಣವೂ ಕೃಷ್ಣಾರ್ಪಣ.

ಮಾಲೀಕ ಕ್ಯಾಲೆಂಡರ್‌ನ ತಿಂಗಳ ಹಾಳೆ ತಿರುಗಿಸುವುದಷ್ಟರಲ್ಲಿ ಅಪ್ಪ ಹಾಜರು. ಮಾಲೀಕನ ಮುಂದೆ ಹಲ್ಲು ಗಿಂಜಿ, ಮಗನ ಹೆಸರಲ್ಲೇ ದೋಸೆ, ಕಾಫಿ ಅನುಭವಿಸಿ “ಚೆನ್ನಾಗಿ ಕೆಲಸ ಮಾಡು, ಮಗಾ’ ಎಂದು ಹೇಳಿ ಮುಖ ಎತ್ತದೇ ಮನೆ ದಾರಿ ಹಿಡಿಯೋದು ಅವನ ಜಾಯಮಾನ.

ಮಾಲೀಕನಿಗೆ ಪೋರನ ಅಪ್ಪ ಜೀತ. ಅಪ್ಪನಿಗೆ ಮಗ ಆಳು !

Advertisements

4 thoughts on “ಅವನಿಗೆ ಇವನು ಆಳು !

  1. ಸುಪ್ತದೀಪ್ತಿಯವರೇ,
    ಈ ಚಿತ್ರಿಕೆ ನಾನು ತೀರಾ ಹತ್ತಿರದಿಂದ ಕಂಡಿದ್ದು. ನನ್ನ ಬರಹಗಳು ನಿಮಗೆ ಇಷ್ಟವಾಗಿದ್ದಕ್ಕೆ ಸಂತೋಷವಾಗಿದೆ. ನಿಮ್ಮ ಮುರಳಿ ಬಗೆಗಿನ ಲಹರಿಗಳೂ ಬಹಳ ಚೆನ್ನಾಗಿವೆ.

    ನಾವಡ

ನಿಮ್ಮದೊಂದು ಉತ್ತರ

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s